Қасым-Жомарт Тоқаев Ақмола облысындағы бірқатар нысандарды аралады

Президент «Бижан» ет өңдеу зауыты» ЖШС-на барды. Бұл туралы Ақорданың баспасөз қызметі хабарлайды. 

Мемлекет басшысы өндіріс ғимаратын аралап көріп, облыстың ет өңдеу зауыты өндірген өнімдермен танысты. «Бижан» ЖШС – өңірдегі ет өнімін өндіретін ірі кәсіпорындардың бірі. Зауытта шұжықтың 15 түрі, ет консервілері мен жартылай фабрикаттар және тағы да басқа өнім түрлері өндіріледі. Кәсіпорын 115-тен астам адамды жұмыспен қамтып отыр.

Нысанды аралау барысында Ақмола облысының әкімі Ермек Маржықпаев Президентке өңірдегі ауыл шаруашылығы өнімдерін өңдеу саласын дамыту жайында мәлімет берді.

Сонымен қатар Қасым-Жомарт Тоқаев «Новопэк» ЖШС-ның жұмысымен танысты. 

Мемлекет басшысы полипропилен бұйымдарын жасайтын кәсіпорындағы өнім шығару жұмысының технологиялық процесімен танысты.

Өндірілетін өнім әлемдік стандарттарға сай келеді және Беларусь, Қырғызстан, Ресей, Тәжікстан елдеріне экспортталады. Зауытта 940-тан астам адам жұмыс істейді.

Компанияның бас директоры Рүстем Османов Президентке кәсіпорын қызметкерлеріне арналған 600 орындық жатақхананың құрылысы туралы және мемлекеттік-жекеменшік әріптестік аясында салынатын балабақша жайында баяндады.

Мемлекет басшысы «Ақай» тігін шеберханасына барды. Президент Ақмола облысына сапары барысында «Ақай» тігін шеберханасының жұмысымен танысты.

Қасым-Жомарт Тоқаев шығарылып жатқан өнімдердің сапасын жоғары бағалап, ұжымға табыс пен өркендей беруді тіледі.

Кәсіпорын қызметкерлері Мемлекет басшысына шағын және орта бизнеске көрсеткен қолдауы үшін алғыс айтты.

 

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу