Премьер-Министр Асқар Маминнің төрағалығымен өткен Үкімет отырысында білім және ғылым министрі Асхат Аймағамбетов жаңа оқу жылына дайындық барысы туралы баяндады. 

А. Аймағамбетов атап өткендей, педагогтер мен оқушылардың коронавирус инфекциясы мен жіті респираторлық вирустық инфекцияларды жұқтыру қаупі жоғары. Мәселен, тек ЖРВИ-мен жыл сайын оқушылардың 70%-ына дейін ауырады. Осыған байланысты Білім және ғылым министрлігі балалар үшін мектептерді ашуға әлі ерте деп санайды және төртінші тоқсандағы тәжірибені қайталауды  — қашықтан оқыту форматын жалғастыруды ұсынды. 

«Бірінші. Шалғайдағы ауылдардағы шағын жинақты мектептерді ескермегенде, 1 қыркүйекте оқу жылын еліміздің барлық мектептерінде 1-11 сыныптар үшін қашықтан оқыту форматында бастау. Екінші. Бастауыш сыныптардың оқушыларының ата-анасының өтініші бойынша тиісті мүмкіндіктерге қарай отырып, қатаң санитарлық шараларды сақтаумен кезекші сыныптардың жұмыс істеуіне мүмкіндік беру», — деді министр.

Бұл бастауыш сыныптардың оқушыларының жас ерекшеліктеріне, өз бетінше білім алу және өзін өзі тәртіпке салу дағдыларының қалыптаса бастауына байланысты. Бірақ мұндай жағдайда мектептерде санитарлық қауіпсіздік шаралары барынша күшейтілетін болады. 

«Балалар тек бір кабинетте оқиды, үзілістері әр түрлі уақытта болады, кіре берісте дене қызуын өлшеуді ұйымдастыратын боламыз, ауаны тазарту, кварцтау және ылғалды тазалау режимі күшейтіледі. Әлеуметтік ара қашықтықты сақтау үшін оқытуды ауысымдарға және бала саны 10-15 баладан аспайтын шағын топтарға бөлу, мектепте оқыту күндерінің кезегі жасалады. Сонымен қатар, бұл балалар үшін пәндердің бір бөлігі, десек те, қашықтан оқытылатын болады», — деді БҒМ басшысы. 

Үшінші. Шалғайда орналасқан шағын жинақты ауылдық мектептерде штаттық форматта оқыту мүмкіндігі ұсынылады. Бұл жалпы оқушылар санының 4% құрайды.  Осы критерийге сәйкес келетін барлығы 127 мың бала контингентімен 1934  мектеп анықталды. 

Министр қашықтан оқытудың тек жаңа оқу жылының басталуына қатысты шешім екенін атап айтты. 

«Төртінші. Алдағы уақытта бірінші тоқсан аяқталғаннан кейін эпидемиологиялық жағдайдың тұрақталуына байланысты мектептердің кезең-кезеңмен аралас оқыту және штаттық форматта оқыту жүргізілетін болады», — деді ол.

Бесінші. Үйде оқытудың ең осал топтары — ерекше білім беруді қажет ететін балалар және табысы төмен отбасылардың балалары, бастауыш сыныптардың оқушылары болғандықтан, осы санаттағы балаларға инклюзивті және қолжетімді білім беру қамтамасыз етілетін болады.  

Асхат Аймағамбетов сонымен қатар білім саласының жаңа оқу жылына қандай дайындық жұмыстарын жүргізіп жатқанына тоқталды. БҒМ мәліметі бойынша, әзірлік барысында 35 мың компьютер сатып алынған. Жергілікті атқарушы органдар мектептерді, мұғалімдерді және оқушыларды компьютерлермен және интернетке қосылумен қамтамасыз етуі тиіс. 

Төртінші тоқсанның қорытындысы бойынша педагогтердің және оқушылардың ұсыныстары бойынша БҒМ интернет-платформаларды жаңғырту жұмыстарын жүргізді. Бірінші және екінші тоқсандағы пәндер бойынша оқу материалдары дайын. Онлайн оқыту үшін әкімдіктер әр мектепте стриминг мүмкіндігі бар интернет-платформаға қосылу мүмкіндігін қамтамасыз етуі керек.   

Сонымен қатар контенттік қамтамасыз ету және телесабақтарды дайындау бойынша ауқымды жұмыстар ұйымдастырылды. 

«Педагогтерді оқыту үшін 5 модуль бойынша АТ-құзыреттілік дамыту, киберпедагогика және әдіснаманы оқытуға бағытталған онлайн-курстар әзірленді. Онлайн-курстардың басталуы педагогтердің 20 шілдеден еңбек демалысынан шығуына байланысты, 350 мыңға жуық педагог осы курстарда оқытылады», — деді А. Аймағамбетов.

Жаңа оқу жылын колледждер де қашықтан оқыту режимінде бастайды. Дәстүрлі формат жеке кесте бойынша өндірістік оқытуды және кәсіби практиканы ұйымдастыру кезеңінде көбіне бірінші және бітіруші курстардың білім алушылары үшін, сондай-ақ шалғайда орналасқан колледждерде аз контингент болса, санитарлық нормаларды сақтай отырып жүргізіледі. 

ЭЫДҰ және Дүниежүзілік банктің сарапшыларының мәліметі бойынша Covid-19 пандемиясы барлық әлемде көптеген оқушылардың білім алуда айтарлықтай қиындықтарға тап болуына әкелген. Covid-19 індетінің білім саласына кері ықпалы ел экономикасына ұзақ уақыт бойы әсер етуі мүмкін. Сондықтан білім алуда болып жатқан осы әсерінің орнын толтыру үшін қосымша шаралар әзірленді. Төртінші тоқсан нәтижесі бойынша зерттеулер жүргізіліп, сарапшылармен талқыланып, ата-аналар қауымының, қоғамның пікірі ескерілді. Сонымен қатар шетел тәжірибесі зерделенді.  

«Білім беру саласындағы уәкілетті орган ретінде Білім және ғылым министрлігі бір жағынан сапалы білім беруді қамтамасыз етуі керек болса, екінші жағынан балалар мен педагогтердің арасында вирустың таралу қаупін болдырмау үшін барынша іс-әрекет жасауы қажет екенін түсінеміз. Жалпы, жаңа оқу жылына дайындық бойынша іс-шаралар кешенді түрде жалғастырылатын болады», — деп түйіндеді министр.