Оңалту құралдары мен қызметтерін ерекше қажеттіліктері бар адамдар бірыңғай интернет-порталдан таңдай алады — ҚР ЕХӘҚМ

«Біз мемлекеттік сатып алуларға жүгіне бермей, мүмкіндігі шектеулі жанға өзіне қажетті техникалық құралды, қызметтерді, әлеуметтік қызметкерді таңдауға мүмкіндік беруіміз керек». Бұл туралы Үкіметте өткен баспасөз конференциясы барысында ҚР еңбек және халықты әлеуметтік қорғау вице-министрі Светлана Жақыпова айтып берді.

Ерекше қажеттіліктері бар қазақстандықтар арнайы портал арқылы бюджет есебінен қажетті техникалық және қозғалу құралдарын таңдап, сатып ала алады, бұл, өз кезегінде, сапасыз және сәйкес келмейтін арнайы құралдарды сатып алу мәселесін шешуге жол ашады.

«Әлеуметтік қызметтер порталы – мұнда ерекше қажеттіліктері бар азамат қандай да бір өнімнің немесе қызметтің жеткізушісін көріп, өзіне өнім таңдауға құқылы. Егер ол санаты жоғары техникалық құралды таңдаса, ол үстіне өзі ақша қоса алады (егер бағасы бюджетте көзделген бағадан қымбатырақ болса). Бұл техникалық құралдарға, реабилитацияға ғана емес, әлеуметтік қызметкерді, жеке көмекшіні, санаторийлік-курорттық емді таңдауға да қатысты», — деді С. Жақыпова.

Сонымен қоса, еңбек және халықты әлеуметтік қорғау вице-министрі порталдың өз жұмысын жылдың соңына дейін бастауы керектігін атап айтты. Портал бірыңғай цифрлық алаңда әлеуметтік қызмет алушылар мен жеткізушілерді біріктіріп, сапалырақ қызметтер, құралдар, құрылғылар мен ассистивті технологиялар алуға мүмкіндік береді.  

Статистика бойынша, 2019 жылғы 1 қаңтардағы жағдайға сәйкес, Қазақстанда 685 мың мүмкіндігі шектеулі жан бар, оның ішінде 421 мың адам (61,5%) еңбекке қабілетті жаста, 176 мың адам  (25,7%) – зейнет жасындағы тұлғалар және 88 мың адам (12,8%) – 18 жасқа дейінгі балалар. Ерекше қажеттіліктері бар балаларды тәрбиелеп отырған отбасыларға 1 шілдеден бастап төленетін жәрдемақы мөлшері көтеріледі.

«Егер бүгінде біз 31 мың теңге төлеп отырсақ, 1 шілдеден бастап 41 мың 578 теңге төлейтін боламыз», — деді С. Жақыпова.

 Бүгінде ерекше қажеттіліктері бар тұлғаларды қолдау үшін мемлекеттік бюджеттен 323 млрд теңгеден астам қаржы бөлініп отыр.

 Сонымен қатар, мүмкіндігі шектеулі балаларды бағып отырған аналар үшін әлеуметтік жұмыс орындарын ашу туралы мәселе қарастырылып жатыр.

«Ерекше қажеттіліктері бар балаларды бағып отырған аналар үшін біз әлеуметтік жұмыс орындарын ашу мәселесін қарастырып жатырмыз, яғни олар үйде отырып жұмыс істей алатын болады. 24 сағат бойы анасының күтімін қажет ететін балалар бар, соның арасында ондай аналар жұмыс істеп, табыс таба алады», — деді С. Жақыпова.

 

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу