Бүгін Ақордада Үкіметтің кеңейтілген отырысы өтіп жатыр.  Оған ҚР Президенті Нұрсұлтан Назарбаев төрағалық етуде. «Үкіметтің ағымдағы жылғы басты міндеттері айқындалып, шешімдер қабылданды. Бұл - биылғы Жолдауда айтылған 2050-ге дейінгі бағдарлама. Біз осы бағытта отыз өркендеген елдің қатарынан көрінуіміз керек. Барлық өңірлерді менің тапсырмаммен Үкімет басшысы аралап шықты, әкімдермен кездесті. Бағдарламалар бекітілді, индустриялық жоспарлар бар. Дүниеде болып жатқан алмағайып заманда, оның ішінде ТМД елдерінде орын алған оқиғалар аясында біз де барлық мәселелерді сараптан өткізіп тұруға тиіспіз. Қазақстанға осындай оқиғалардың қиындығы тиеді, ол қай бағытта тиеді, оның алдын алу үшін не істеу керек? Ең негізгі мәселе экономиканы өркендетуді жолға қоюымыз керек. Бүгін негізгі әңгіме осы жайында болады», - деді жиынды ашқан Елбасы Н. Назарбаев.

Сонымен қатар, Президент жаңа Премьердің қызметіне бір тоқсан өткенін, соның қорытындысы жасалатынын атап өтіп, алдағы уақытта не істелетіні талқыланып, ортақ шешім қабылданатынын айтты.

Жиын барысында Елбасы әлемдік экономиканың бүгінгі жағдайы мен ТМД кеңістігіндегі жағдайларға тоқтала келе, олардың өңірлік қана емес, жаһандық сипатта екенін, оған Қазақстан да мұқият назар аудару керектігін атап өтті.

«Әрбір басшысы, мейлі ол жергілікті жерде болсын, мейлі орталық органда болсын, енді не істеу керектігін мұқият білуі керек. Ал алдағы уақытта Үкіметтің экономикалық саясаты бүгінгі тап болған тәуекелдерді шешуге негізделуі тиіс. Сондықтан да, біз бүгін ең алдымен ағымдағы экономикалық саясатты саралап, жаңа жағдайларды ескере келе, жаңа шараларды қабылдауға тиіспіз», - деді Елбасы Н. Назарбаев.

Ұлттық қордан бөлінген 100 млрд. теңге кәсіпкерлердің қолына тиюде. Бұл туралы бүгін Ақордада ҚР Президенті Нұрсұлтан Назарбаевтың төрағалығымен өтіп жатқан Үкіметтің кеңейтілген отырысында ҚР Премьер-Министрінің бірінші орынбасары Бақытжан Сағынтаев мәлім етті.

Оның атап өтуінше, ағымдағы жылы Үкімет қызметіне негізінен «Қазақстан-2050» стратегиясын жүзеге асыруға бағытталды. Қазақстанның әлемнің дамыған отыз елінің қатарына қосылуын көздейтін ұзақмерзімді стратегиясын ескере отырып, Үкімет стратегиялық бағдарламалық құжаттарды түзетіп, бірқатар жаңа мемлекеттік және салалық бағдарламаларды қабылдады.

«Әлемдік экономиканың баяулауы және геосаяси тәуекелдердің тереңдеуі аясында 2014 жылға арналған әлеуметтік-экономикалық саясаттың бірінші кезекті шараларының жол картасы қабылданды. Онда негізгі басымдық экономикалық өсімге жағдай жасауға бағытталды», - деді ол.

Б.Сағынтаевтың сөзіне қарағанда, ең бірінші кезекте экономикалық өсімді қамтамасыз ететін және бизнесті қолдауға бағытталған шаралар қабылданды. Экономикалық өсімге Елбасы Н.Назарбаевтың бастамасымен Ұлттық қордан бөлінген 1 трлн. теңге тың серпін берді.

«Бүгінгі таңда экономиканың басты салаларындағы инвестициялық жобалар айқындалды. Олардың алдын ала сомасы 5,5 млрд. долларды құрайды. Шағын және орта бизнесті қолдау үшін Ұлттық қордан бөлінген бірінші жүз млрд. теңге қазіргі уақытта кәсіпкерлердің қолына тиюде. Банктермен жалпы сомасы 70 млрд. теңгені құрайтын 327 жоба мақұлданды», - деді Б.Сағынтаев.

Индустрияландыру бағдарламасы аясында іске қосылған кәсіпорындар өздерінің толық өндірістік қуатына шығуы тиіс. Елбасы өз сөзінде индустрияландырудың бірінші бесжылдығы аясында жеті жүзден астам кәсіпорынның іске қосылғандығын атап өтті.

«Барлық әкімдер  біз салған осы кәсіпорындар өз қуаттарын игеруін жіті бақылауға алулары керек. Әр жерден шағын және орта бизнестен экономикаға пайдасын тигізетіндей жағдай жасалуы тиіс», - деді Н.Назарбаев.

ҚР Президенті өз сөзінде  әлемдік экономикада тұрақсыздық орын алып отырғанын әрі біраз уақыт оның сақталуы мүмкін екендігін де баса атап өтті.

«Сондықтан әрбір мекеме, шағын бизнес, жақында іске қосылған зауыт пен фабрика жұмыс істеулері қажет. Кейбіреулері елу пайызға, отыз пайызға дейінгі өзінің қуатына жеткен жоқ. Солардың әрқайсысы, әр облыста резервте тұруы керек», - деді Мемлекет басшысы.

«Жекешелендірудің екінші толқынындағы әрбір нысанның сатылуы ашық, транспарентті түрде жүзеге асуы керек. Халық білуге тиіс: конкурстың қалай өткенін, кімнің нені иеленгенін, кім не жасаймын деп уәде еткенін. Мұның бәріне халық хабардар болуы керек. Бұл үшін не істеліп жатыр?» - деп сұрады Елбасы жиын барысында Қаржы министрі Бақыт Сұлтановқа қарата айтқан сөзінде.

Өз кезегінде министр жекешелендіру үдерісінің жариялылығы үшін арнайы вебпортал құрылғанын, сол арқылы ашықтық толығымен қамтамасыз етілетінін атап өтті.

«Қателіктерге бой алдырмаңдар. Жекешелендірудің бірінші кезеңі қалай өткені белгілі, кімде билік болса, сол өзі таратып, өзі иеленіп кете берген. Қазір соның салдарынан заңсыз берілген жерді де, мүлікті де қайтарып алуға дейін барып жатырмыз. Бұл жағдай енді қайталанбауы керек. Бұл ретте біріншіден, мемлекет бизнестен кетеді, екіншіден, бұл нысандардың барлығы нарықтық ортаға өтіп, іскерлік ортаның белсенділігін арттырады. Жекешелендіру тиімді жүргізіліп, нысандар жақсы қолға өтсе, экономика да жеңілдеп, бюджетке де қаражат құйылады. Бұл - аса маңызды шара», - деді Н. Назарбаев.

Тоқтала кететін жайт, жекешелендірудің екінші толқынын жүзеге асырудың кешенді жоспарына сәйкес, сегіз жүз елу үш нысан жеке секторға өтеді. «Олардың ішінде биыл екі жүз тоқсан бесі сатылады. Қазірдің өзінде он төрт нысан төрт жүз отыз жеті миллион теңгеге сатылды», - дейді Қаржы министрі Б. Сұлтанов.


«Самұрық-Қазына» қорына кіретін топтың капитал құны 2010 жылғы 36 млрд. доллардан қазіргі күні 48,7 млрд. долларға немесе  26 пайызға артты. Бүгін  Ақордада Президент Н. Назарбаевтың қатысуымен өтіп жатқан ҚР Үкіметінің кеңейтілген отырысында «Самұрық-Қазына» Ұлттық әл-ауқат қорының Басқарма Төрағасы Өмірзақ Шөкеев осылай мәлім етті.

«Қорға қатысты республикалық бюджеттен қаржыландыру көрсеткіші жыл сайын төмендеп келеді. Егер 2010 жылы бұл 106 миллиард теңге болса, қазір 73 миллиард теңгені құрап отыр. сонымен қатар аталған қаражат негізінен Үкіметтің тапсырмасына сәйкес, тек экономиканың басым салаларына, сондай-ақ әлеуметтік бағдарланған жобаларға бағытталады», - деді Ө. Шөкеев. Оның айтуынша, Қорға тиесілі сыртқы қарыз шамасы да біраз төмендеген. «Бұл бағытта қатаң саясат ұстану арқасында біз директорлар кеңесі ұсынған дәлізден шыққан емеспіз. Жалпы тиімді сыртқы қарыздың қазіргі көрсеткіші 14 миллион долларға жетті. Бұл әлеуетті біз кез келген уақытта қажет болатын жаңа инвестициялық жобаға жұмсай аламыз», - деді Ө. Шөкеев. 

Үкіметке жыл соңына дейін Қызмет көрсету саласын дамытудың 2020 жылға дейінгі кешенді бағдарламасын қабылдауды тапсырамын, деді Мемлекет басшысы Ақордада өтіп жатқан Үкіметтің кеңейтілген отырысында.

Сондай-ақ, Елбасы Экономикамыздың жаңа интеграциялық жағдайда дамуын қамтамасыз етуді жалғастыра беру қажет екендігін айтты.

Үкімет ауыл шаруашылығы тауарларын өндірушілерге субсидия беру тетіктерін өзгертуі қажет. Бүгін Ақордада өтіп жатқан Үкіметтің кеңейтілген отырысында ҚР Президенті Нұрсұлтан Назарбаев осындай тапсырма берді. Мемлекет басшысының атап өтуінше, жыл сайын мемлекет ауыл шаруашылығы саласына бөлінетін субсидия көлемі артып келеді. Мәселен, соңғы бес жылдың ішінде ғана субсидия көлемі екі есеге артқан.

«Ал нәтижесі қандай? Алдыңғы қатарлы техологиялар енгізіп, сұранысқа ие ауыл шаруашылығы өнімдерін өндіретін тауар өндірушілер ғана субсия алатындығын бірнеше мәрте айттым. Сондықтан тағы бір мәрте Үкіметке ауыл шаруашылығы тауарларын өндірушілерге субсидия беру тетіктерін өзгертуді тапсырамын», - деді Елбасы.

Президент Н. Назарбаев Қазақстан экономикасының жаңа интеграциялық жағдайда жұмыс істеу шараларын тереңдетуі керектігін айтты.

«Келесі жылдың бірінші қаңтарынан Еуразиялық экономикалық одақ туралы шарт күшіне енеді. Біз Қазақстанның Дүниежүзілік сауда ұйымына енетін қорытынды кезеңінде тұрмыз. Ағымдағы жылдың желтоқсанына дейін Економикалық ынтымақтастық және даму ұйымымен ынтымақтастықтың мемлекетаралық бағдарламасы қабылданады. Сондықтан да біздің экономикамыздың жаңа интеграциялық жағдайда жұмыс істеуіне қатысты шараларды тереңдетуге тиіспіз», деп атап өтті Елбасы.

Бұдан бөлек, Н. Назарбаев ресейлік және беларусьтік өңірлермен белсенді жұмыс істейтін уақыттың келгенін атап өтті. Бұл ретте Президент мәселені қарастырып, елдер арасындағы сауда-саттық өкілдіктерін ашудың маңыздылығына да тоқталды.

«Экспортты әртараптандыру үшін көлік саласын дамыту да маңызды. Бізге Қытаймен арадағы Қорғас шығыс қақпасындағы арнайы экономикалық аймақ жұмысын аяқтау керек. Ақтаудағы теңіз порттарындағы инфрақұрылымды бітіру де маңызды мәселе», - деді Н. Назарбаев.

Қазіргі заман талабы тиімді мемлекеттік басқару жүйесі мен шағын Үкімет құру.

Бүгін Ақордада өтіп жатқан Үкіметтің кеңейтілген отырысында Мемлекет басшысы Нұрсұлтан Назарбаев осылай айтты.

«Тек соңғы жылдарда ғана министрліктер арасындағы құжат айналымы 3-4 есе өскен. Мемлекеттік қызметкерлердің саны 2003 жылдан бері 8,5 мыңға жуық адамға өсіп, қазір 90 мыңды құрап отыр. Сондықтан кез келген басшы өз аппаратын қалай жетілдіру керектігін ойлауы қажет. Ал қызметкерлер штатын көбейте берудің не қажеті бар?» - деді Мемлекет басшысы.

«Шынымен де қазір бізге шағын ғана Үкімет құрып, шешім қабылдау орталығын министрліктер деңгейіне ауыстыру қажет. Мен мынадай шешім қабылдадым: Үкіметтің жаңа құрамы 12 министрлік пен 30 комитеттен құрылатын болады», - деді Елбасы.

ҚазАқпарат

Жарияланды: 06 тамыз 2014

Мұрағат

Тамыз
2014
ДсСсСрБсЖмСнЖк
123
45678910
11121314151617
18192021222324
25262728293031

Мемлекеттік орган басшыларының блог-тұғырнамасы

Өту