26 Тамыз 2019, 08:41
23 тамызда Қазақстан Республикасының Премьер-Министрі Асқар Мамин жұмыс сапарымен Ақтөбе облысында болып қайтты.
Үкімет басшысы Ақтөбе ферроқорытпалар зауытының жұмысымен танысты. Премьер-Министрге мүмкіндігі шектеулі жандар еңбекпен қамтылған бірегей жоба көрсетілді. Жұмыскерлер зауытта қауіпсіздік техникасының сақталуына тәулік бойы тікелей бақылау жүргізеді.
Хромтау қаласында Асқар Мамин «Восход» кен орнында болды. Кәсіпорынға салынған инвестициялардың жалпы көлемі 65 млрд теңгені құрайды.
Байғанин ауданында Премьер-Министр 2018 жылы желтоқсан айында пайдалануға берілген «Gas Processing Company» ЖШС зауытына барды.
Келесі нысан «СНПС-Ақтөбемұнайгаз» АҚ Жаңажол газ өңдеу зауыты болды. Кәсіпорында 1,5 мың адам жұмыс істейді.
Жаңажол ГӨЗ аумағында Асқар Мамин мемлекеттік органдардың, мұнай-газ секторындағы кәсіпорындардың және кәсіподақтардың басшыларының қатысуымен мұнай-газ саласын дамыту және еңбек құқықтарын сақтау мәселелері жөнінде жұмыстық кеңес өткізді.
Жұмыс сапары аясында Асқар Мамин «Ақтөбе – Атырау – РФ шекарасы (Астрахань)» автомобиль жолының салыну барысымен танысты. 2019 жылы Ақтөбе облысының аумағында 148,2 шақырым жолда қозғалыс ашылады деп көзделіп отыр.
Бұдан соң Үкімет басшысы «Ақтөбе қ. оңтүстік айналма жолы» автожолының реконструкциясы барысын көрді. Бұл жол Ақтөбе қаласы маңында транзиттік автокөліктің айналып өтуін, «Самара – Шымкент» республикалық маңызы бар тас жолынан «Ақтөбе – Атырау – Астрахань» тас жолына шығу мүмкіндігін және «Батыс Еуропа – Батыс Қытай» көлік дәлізіне шығуды қамтамасыз етеді.
Сонымен қатар Асқар Мамин «IBG Catering» ЖШС жол бойы сервисі көпфункционалды кешенін аралады. Жоба құны – 500 млн теңге.
Премьер-Министр Аскар Мамин салынып жатқан «Нұр Ақтөбе» ықшам ауданын аралап көрді. Биыл жыл соңына дейін Ақтөбе қаласындағы және облыс аудандарындағы 410 көп балалы отбасыны тұрғын үймен қамту жоспарланған.
Жұмыс сапары аясында Үкімет басшысы жақында іске қосылатын «Көктас-Ақтөбе» құрылыс материалдары зауытына барды.
Сонымен қатар Асқар Мамин «Глобал Спецодежда» тігін фабрикасының жұмысымен танысты. Кәсіпорын жыл сайын 250 мың бұйым шығарады.
Жұмыс сапарының соңында ҚР Премьер-Министрі өңірде ауыл шаруашылығы саласындағы инвестициялық жобалардың іске асырылуы бойынша «Ақтөбе ет кластері» ЖШС ет өңдеу комбинаты мен «Айс» ЖШС сүт-тауарлық фермасына барды. Сондай-ақ, Асқар Мамин Ақтөбе облысындағы АӨК инвестициялық жобаларымен танысты.
Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз
Жазылу