Қарағанды облысының әкімі Жеңіс Қасымбек Орталық коммуникациялар қызметінде өткен брифингте өңірдің әлеуметтік-экономикалық дамуы туралы баяндады. Мәселен, бірінші кезекте әкім өңірдегі эпидемиологиялық жағдай туралы хабарлады.

«Соңғы айда облыс бойынша аурушаңдық 2,3 есе азайды. Қараша айында вирус жұқтырғандар саны тұрақты көрсеткіш аясында. Соған байланысты ауруханалардағы инфекциялық орындардың жүктемесі 35%-дан 22,9%-ға дейін қысқарды. Коронавируспен ауыру азая бастаса да, біз пандемияның жаңа толқыны жағдайына әрқашан дайын боламыз», — деді Ж. Қасымбек.

Резервте 44 стационар мен 8 мыңнан астам медицина қызметкері бар инфрақұрылымның дайындығы қамтамасыз етілді. Бұл ретте жоспарлы медициналық көмекті толық көлемде көрсету сақталады. Коронавирусқа қарсы жаппай иммундау жалғасуда. Ол үшін облыста жеткілікті мөлшерде вакциналық препараттардың жеткілікті ассортименті бар. Биылғы жылғы 29 қарашадағы жағдай бойынша өңірде иммундаумен жалпы қамту 64,8% құрап отыр. 

Облыста екі аптадан бері жасөспірімдер мен жүкті әйелдерді және бала емізетін әйелдерді Pfizer вакцинасымен егу жүргізіліп жатыр. Бұл бағыттағы жұмыс жалғасуда.

Облыстың әлеуметтік-экономикалық дамуы бойынша қысқаша баяндай отырып, Жеңіс Қасымбек биылғы 10 айдың қорытындысы бойынша экономиканың барлық негізгі салалары бойынша оң көрсеткіштерге қол жеткізілгенін атап өтті. Өнеркәсіп өндірісі 0,1%-ға өсіп, 3,4 трлн теңгеге жетті. Оның ішінде, қара металлургияда 12,4%-ға, жеңіл өнеркәсіпте 11,9%-ға, фармацевтикада 5,8 есеге өсті.

«Бүгінде өңірдегі тұрғын үй құрылысының қарқыны Тәуелсіздіктің барлық жылдары ішіндегі рекордтық көрсеткіш болып табылады. Жыл қорытындысы бойынша 662 мың шаршы метр тұрғын үйді пайдалануға беруді жоспарлап отырмыз. Бұл өткен жылмен салыстырғанда 25%-ға артық. 2 600-ден астам отбасы мемлекеттік арендалық және кредиттік тұрғын үй алады», — деді өңір басшысы.

Сонымен қатар Жеңіс Қасымбектің айтуынша, өңір инвестициялық тартымды болып табылады.

«Біз алдымызға 2021 жылдың соңына дейін инвестиция көлемін 740 млрд теңгеге дейін жеткізіп, 14 жаңа өндіріс есебінен 2 000-ға жуық жұмыс орнын құру жоспарын қойдық. Олардың жетеуі қазірдің өзінде іске қосылды. Биылғы жылғы 10 айдың қорытындылары бойынша жоспарларда белгіленген көрсеткіштерден озып келеміз деп нық сеніммен айта аламын. Негізгі капиталда 607 млрд теңгеден астам қаражат бар, оның 73%-ы – жекеменшік инвестициялар», — деді әкім. 

Ел Президентінің берген тапсырмасына сәйкес моноқалалардың экономикасын әртараптандыру бойынша белсенді жұмыс жүргізіліп жатыр. Өңдеу өнеркәсібінің бірқатар ірі жобалары іске асырылуда. Мысалы, Саран қаласындағы бұрынғы РТИ зауытының алаңында Индустриялық аймақ құрылды. Қазірдің өзінде Yutong маркалы автобустар шығаратын зауыт жұмыс істейді. Ресейлік «Татнефть» компаниясымен бірге «KamaTyresKZ» автомобиль шиналарын шығаратын зауыт салынып жатыр. Зауыт келесі жылдың қараша айында іске қосылады.

Биылғы жылғы 20 қазанда Қазақстан Республикасы Президентінің қатысуымен Жайрем кен-байыту комбинатының жаңа полиметалл фабрикасы іске қосылды. Кәсіпорында жылына 5 млн тоннаға жуық кен өңделетін болады. Жаңа фабрика моноқалаға келешекте 100 жылға дейінгі жұмыс перспективасын қамтамасыз етеді.

Сондай-ақ мал шаруашылығындағы өндірістің артуы есебінен ауыл шаруашылығында тұрақты өсім байқалады. Қиындықтарға қарамастан дәнді дақылдардың жақсы және сапалы өнімін жинауға мүмкіндік туды.

940 мың тоннадан астам жоғары сапалы астық бастырылды. Оның ішінде 1 және 2 санатты 600 мың тоннадан астам бидай, 410,5 мың тонна картоп және 109,5 мың тонна көкөніс жиналды. Астықтың, картоптың және көкөністердің резервтік және тұрақтандыру қорлары құрылды.

Шағын және орта бизнес секторына облыстың әрбір үшінші тұрғыны тартылған. 10 ай ішінде жұмыс істеп тұрған ШОБ субъектілерінің саны 5,3%-ға өсті.

Мемлекеттік бағдарламалар арқылы 116,4 млрд теңгеге 3,7 мыңнан астам жоба қаржылық қолдау алды. Жыл соңына дейін тағы 700-ге жуық жобаны қаржыландыру жоспарда бар.

«Моноқалалардың облыстың кәсіпкерлігін дамытуға қосқан үлесі 30%-дан асады», — деді Ж. Қасымбек.

Қаржыландыруға қолжетімділікті арттыру үшін, әсіресе моноқалалар мен шалғай өңірлердің кәсіпкерлері үшін «Атамекен Қарағанды» МҚҰ іске қосылды. Ол үшін бюджет қаражаты және қала құраушы кәсіпорындардың қаражаты тартылды.

Мемлекет басшысының моноқалалардағы ШОБ-ты 5% жеңілдікпен қаржыландыру туралы тапсырмасы қала құраушы кәсіпорындарға тәуелсіз кәсіпкерліктің жаңа салаларын ашуға қосымша серпін береді. Осындай салалардың бірі Балқаш аймағы мен Жезқазған өңіріндегі туризм болды.

Балқашта инженерлік коммуникациялар жүргізіліп, сервистік инфрақұрылым салынуда. Ұлытау ауданында «Жошы хан» кесенесіне жақын жерде визит-орталық пен кешеннің құрылысы аяқталды.

Жалпы, жыл басынан бері жұмыспен қамту органдары арқылы 31 мыңнан астам адамды жұмысқа орналастыруға мүмкіндік туды. Жұмыссыздық деңгейі 4,5% деңгейінде сақталды.

Өңірде жылыту маусымы жалғасуда. Жылумен жабдықтаудың барлық объектілері штаттық режимде жұмыс істейді. Биыл Балқаш ЖЭО-нан Қоңырат ш/а дейін магистралды жылу желілері салынды. Шахтинск қаласының Шахан кентінде орталық қазандық пен магистралды жылу желілерінің құрылысы аяқталды. Сондай-ақ Қарағанды мен Жезқазғанның магистралды жылу желілерін қайта құру жұмыстары жүргізілуде.

Газ Қарағанды, Теміртау және Жезқазған қалаларында 3 мың үйге жеткізілді. Тариф бекітілді. Осы қалалардағы алғашқы абоненттер үшін газ беруді бастау жоспарлануда.

Сонымен қатар Саран қаласында газ құбырының құрылысы жүргізілуде. Наурыз айынан бастап Жаңаарқа, Осакаров аудандарында және Шахтинск қаласында желілердің құрылысы басталады.

«Сапалы ауыз суға қол жеткізумен қалалар халқының 98%-ы және ауылдық жерлер халқының 89,9%-ы қамтамасыз етілген. Сумен жабдықтау сапасын жақсарту үшін 35 инфрақұрылымдық жоба іске асырылуда. Биыл Сәтпаев қаласын сапалы сумен қамтамасыз ететін Есқұла су тартқышы іске қосылды», — деді Қарағанды облысының әкімі.

Президенттің тапсырмасына сәйкес келесі жылы Үйтас-Айдос су тартқышын қайта жаңарту бойынша жобаны іске асыру басталады. Бұл Жезқазған қаласын Қожамсейіт кен орнынан сапалы сумен қамтамасыз етеді.

Өңірде 1 500 км-ден астам автомобиль жолдары, оның ішінде 800 км-ден астам жергілікті желі автожолдары жөнделді. Тек «Ауыл – Ел бесігі» жобасы бойынша соңғы 3 жылда 38 ауылдық елді мекендегі жолдар жөнделді.

«Қарағанды – Балқаш» және «Балқаш – Бурылбайтал» жаңа жолдарында қозғалыс қамтамасыз етілді. Министрліктің мәліметінше, келесі жылы толық аяқтау жоспарланған.

Жезқазған – Қызылорда автожолы бойынша Қарағанды облысының учаскесі бойынша жол-құрылыс жұмыстарына келесі жылы кірісу жоспарланған.

Облыс әкімінің айтуынша, сапалы жол Жезқазған және Сәтбаев қалаларының сауда-көлік байланысын күшейтуге, сондай-ақ жүк транзитін арттыруға мүмкіндік береді.

Экология министрлігімен бірлесіп әзірленген Жол картасына сәйкес алдағы үш жылда шығарындыларды 30%-ға азайту міндеті тұр.

«АрселорМиттал Теміртау» АҚ жыл сайын 300-ден 600 млн текше метрге дейін табиғи газ сатып алуды жоспарлап отыр. Металлургия комбинатының табиғи газға көшуінің және тағы 22 іс-шараны іске асыруының экологиялық әсері 2025 жылға қарай қоршаған ортаға эмиссияны жоспарланған 30%-ға азайту болады, бұл өңірдегі экологиялық жағдайды жақсартуға айтарлықтай ықпал етеді.

«Жаңартылатын және баламалы энергетиканың жаңа көздерінің құрылысы белсенді жүріп жатыр. Қазірдің өзінде 228 МВт-қа 8 жоба іске асырылды. Балқаш маңында 100 МВт-қа күн электр станциясы салынуда. Саран қаласында 100 МВт және одан жоғары жинақтағыштары бар гибридті күн электр станциясын салу жоспарда бар», — деді Ж. Қасымбек. 

Оқушы орындарының тапшылығы проблемасын шешу үшін жыл соңына дейін таяу жылдарға жоспарланған 17 мектептің 4-і салынады. 166 ауыл мектептеріне жөндеу жұмыстары жүргізілді. 2025 жылға дейін тағы 299 мектеп жаңғыртылатын болады.

Бүгінгі күні халықтың әлеуметтік осал топтарынан шыққан балалар қашықтан және өзіндік жұмыс форматында оқуы үшін компьютерлік техникамен толық қамтамасыз етілген.

Сонымен қатар 1-4 сынып аралығындағы барлық оқушылар тегін ыстық тамақпен қамтылған.

Денсаулық сақтаудың берік инфрақұрылымдық базасын құру үшін өңір үшін бірден бірнеше маңызды жобаларды іске асырамыз. Бұл облыстық көпбейінді аурухана, облыстық онкологиялық диспансердің операциялық-реанимациялық корпусы және сәулелі диагностика және терапия орталығына арналған ғимарат.

Сондай-ақ 21 денсаулық сақтау объектісі, оның ішінде ауылдық жерлерде де жөнделетін болады.

«Биыл біз облыстық балалар ауруханасының құрылысын қайта бастадық. Құрылыс аяқталу сатысында тұр. Балалар спорт мектептерін жан басына қаржыландыруды іске асыруға 1 млрд теңгеден астам қаражат бөлінді. Бұл спорттың 17 түрі бойынша секцияларға 5 мыңнан астам баланы тартуға мүмкіндік берді. Бюджет және бюджеттен тыс қаражат есебінен 13 ірі спорт нысаны салынып жатыр», — деді өңір әкімі.

Ұлытау ауданының Қарсақпай ауылындағы ДСК, Жаңаарқа ауданының Жаңаарқа кентіндегі бассейн, Нұра ауданының Нұра ауылындағы көпфункционалды спорт кешені, Қарағанды қаласындағы Қ. Байшолақов атындағы спорт кешені аяқталу сатысында тұр.

Біздің жұмысымыздың маңызды бөлігі — мүгедектігі бар адамдарды әлеуметтік қолдау. Облыстық бюджет қаражатынан 1 млрд теңге бөлінді.

«Облыс орталығында өткен аптада мүгедектігі бар адамдарды жұмысқа орналастыру орталығы жұмысын бастады, келесі жылы Аутист балаларға арналған оңалту орталығы ашылады. Азаматтық қоғаммен тығыз қарым-қатынас жасау мақсатында облыстың барлық қалалары мен аудандарында мүгедектігі бар адамдардың істері бойынша әкімдердің кеңесшілері тағайындалды. Жалпы, облыстағы қоғамдық-саяси жағдай тұрақты. Жыл соңына дейін экономика салаларында оң динамиканы қамтамасыз ету міндетін қоямыз», — деп түйіндеді Ж. Қасымбек.