ҚР Премьер-Министрі Асқар Мамин жұмыс сапарымен Шығыс Қазақстан, Алматы және Қарағанды облыстарына жұмыс сапарымен барды, онда ел өңірлеріне сапарлар аясында берілген Мемлекет басшысы Қасым-Жомарт Тоқаевтың тапсырмаларының іске асырылу барысын тексерді.

Еліміздің орнықты көлік инфрақұрылымын дамыту мақсатында ҚР Тұңғыш Президенті – Елбасы Нұрсұлтан Назарбаев бастамашы болған «Нұрлы жол» мемлекеттік бағдарламасының орындалу барысына баса көңіл бөлінді.

Шығыс Қазақстан облысында Асқар Мамин «Өскемен – Талдықорған» автожолын салу жобасын іске асыру барысын қарады. Биыл 265 шақырым жолда қозғалысты ашу көзделген. Жалпы, ұзындығы 763 шақырым болатын жол 2020 жылы пайдалануға толықтай беріледі. Бұнымен қоса, «Қалбатау – Майқапшағай» трассасында реконструкциялау жұмыстары жүргізіліп жатыр, онда жыл соңына қарай 135 шақырым автожол пайдалануға беріледі.

Алакөл көлінің жағалауының шығыс бөлігінде соңғы екі жылда 5,3 млрд теңгеге ауқымды жұмыстар жүргізілген. Жағалауды дамыту жұмыстары жалғасуда, жағалау жиегіндегі адамдар серуендейтін жол кеңейтілді. Биыл 31 млрд-тан астам теңгеге 8 ірі инфрақұрылымдық нысанды іске асыруды бастау көзделген: 250 орынға арналған «Керуен Плаза» қонақ үйі, емдеу-сауықтыру кешені, велосипед пен жаяу жүргіншілерге арналған жолдар салынады, парк кеңейтіледі және т.б. Биыл шығыс жағалауға 650 мың турист келеді.

Алматы облысында ҚР Үкіметінің басшысына ұзындығы 355 шақырымдай болатын «Өскемен – Талдықорған» автожолының шығыс бөлігін реконструкциялау, ұзындығы 184 шақырым болатын «Үшарал – Достық» автожолын салу жобасы туралы баяндалды.

Асқар Мамин Ақшы ауылындағы Алакөл көлінің қоршаушы бөгетінің құрылыс орнын тексерді. Нысан жағалауға жақын орналасқан ауылдардың 2,5 мыңнан астам тұрғынын толқындардың салдарынан қорғауға мүмкіндік береді.

Сондай-ақ, Премьер-Министр Алакөл көлінің жағалауындағы демалыс аймағын абаттандыру жұмыстарымен танысты. Өңірде 200-ден астам туристік нысан іске қосылған, 450 орынға арналған «QOQTEM GRAND RESORT» жаңа қонақ үй кешені пайдалануға берілуде. Биыл жаңа қонақ үйлер, сервис нысандарын салу арқылы туристік әлеуетті дамыту шаралары жалғастырылады. Биыл Алакөл көлінің оңтүстік жағалауына 1,3 млн турист келеді деп болжанған.

Қарағанды облысында «Қарағанды – Балқаш» автожолының учаскесіндегі жұмыс тексерілді. Аталған жоба бойынша биыл 187 шақырымда жол қозғалысы ашылады. Нысанды толық пайдалануға беру 2020 жылға жоспарланған. «Қарағанды – Теміртау» және «Қарағанды қ. айналма жолы» жобалары бойынша жұмыстар жыл соңына дейін 61 шақырым жолды пайдалануға берумен аяқталады.

ҚР Премьер-Министрі Асқар Мамин Шығыс Қазақстан облысы жолдарының учаскелеріндегі құрылыстың жоғары қарқынмен жүріп жатқанын атап өтіп, Алматы және Қарағанды облыстарының нысандары бойынша құрылыс жұмыстарының екпінін күшейтуді тапсырды. Қарқынды жұмыс режимі мен жеделдетілген жұмылдыру үшін жобалар құрылысының мерзімдеріне тиісті түзетулер енгізу қажет. Үкімет басшысы жергілікті тұрғындарды объектілерді іске асыруға тартудың, еңбекақы төлеудің қажетті жағдайларын қамтамасыз етудің және қазақстандық қамту үлесін арттырудың маңыздылығын атап өтті.

«Инфрақұрылым жұмыс істеуі керек. "Өскемен – Талдықорған" және "Қарағанды – Алматы" жобалары бойынша міндет – 2020 жылы жолдағы қозғалысты ашу. Сапа мәселесі негізгі басымдықта болуы қажет», — деді А. Мамин. — Алакөл көлінде туристік әлеуетті дамыту жұмыстарын жалғастыру қажет. Биыл шығыс және оңтүстік жағалауларға 2 млн-ға жуық турист келеді».

www.primeminister.kz

ҚР Премьер-Министрінің орынбасары Гүлшара Әбдіқалықова «Астана» халықаралық қаржы орталығында өткен «Инновациялық экономика үшін кәсіпкерлік білім беру» атты ІІІ халықаралық форумға қатысты.

Іс-шара қарсаңында қала тұрғындары мен жастары үшін белгілі сарапшылар мен жаттықтырушылардың шеберлік сабақтары мен тренингтері өтті. Воркшоптарда «Дизайн-ойлау», «Университеттен кейінгі кәсіпкерлік – 10 қателік», «Кәсіпкерлік негіздері: нөлден бірге дейін» және т.б. тренд тақырыптары баяндалды.

Форумға, сонымен қатар «Назарбаев Зияткерлік мектептері» басқармасының төрағасы Светлана Есбосынова, кәсіпкерлік және тартылған университеттердің аккредитациялық кеңесінің негізін қалаушы және төрағасы, University Industry Innovation Network негізін қалаушы Dr. Thorsten Kliewe, IGlobal Университетінің Президенті Dr David Sohn, халықаралық және ұлттық сарапшылар, ЖОО оқытушылары және тағы басқалар қатысты.

Форумды ашқан Вице-Премьер, бүгін де Қазақстанда Үшінші жаңғырту жүзеге асырылып жатқанын атап өтті. Оның мақсаты - шикізаттық тәуелділіктен инновациялық экономикаға көшу. Осыған байланысты ҚР Тұңғыш Президенті – Елбасы Н.Ә. Назарбаев: «Барлық күш-жігер елді болашақ серпіліске дайындауға және мықты Қазақстанды құруға бағытталған», — деп атап өтті.

«Цифрлық дәуірге жаһандық көшу жағдайында әлемдік кәсіпкерлік білім беру басты трендке - бағдарламаларды дараландыру мен мамандандыруды имплементациялауға, оқу процесіне инновациялар мен Төртінші өнеркәсіптік революцияның технологияларын кеңінен енгізуге сәйкес өзгеретін болады», — деді Г. Әбдіқалықова.

Елімізде кәсіпкерлік үшін қажетті жағдайлар жасалған, бизнес-инкубаторлар дамып келеді және ЖОО-да сапалы стартаптардың өсуі үшін мүмкіндіктер бар. Мысалы, Технологиялық даму жөніндегі ұлттық агенттік академиялық бизнес-инкубаторларды қолдау бағдарламасын жүзеге асыруда. Бүгін де осындай 20 құрылым (университеттік, коммерциялық алаңдар және т.б.) жұмыс істейді.

Форумда инновациялық экономика үшін кәсіпкерлік білімді жетілдіру, мемлекет, білім, бизнес және азаматтық қоғам серіктестігін, білім беру мекемелерінде басқару командаларын дамыту және т. б. мәселелер жан-жақты талқыланды.

www.primeminister.kz

Қазақстанның Сыртқы істер министрі Бейбіт Атамқұлов Ұжымдық қауіпсіздік туралы шарт ұйымы (ҰҚШҰ) Сыртқы істер министрлері кеңесінің отырысына қатысты.

Кездесу барысында ҰҚШҰ-ға мүше мемлекеттердің сыртқы саяси ведомстволарының басшылары халықаралық және өңірлік жағдай мәселелері бойынша пікір алмасты, сондай-ақ Ұйым қызметінің ағымдағы жағдайы мен даму перспективаларын талқылап, өзекті сын-қатерлер мен қауіптерге қарсы іс-қимыл шараларының кең ауқымын қарады. 

Қазақстан СІМ басшысы өз сөзінде іс-шараға қатысушылардың назарын Қазақстанның Тұңғыш Президенті - Елбасы Нұрсұлтан Назарбаевтың сенімді нығайту және халықаралық шиеленісті бәсеңдету жолдарын іздеу мақсатында жетекші әлемдік державалар мен халықаралық ұйымдар арасындағы диалогты дамытуды қарастыратын «Үш Д» жаңа геосаяси шындық туралы бастамасына аударды.

ҰҚШҰ Ұжымдық Қауіпсіздік Кеңесінің сессиясына дайындық шеңберінде сыртқы істер министрлері тәжік-ауған шекарасындағы ықтимал шиеленісті азайту жөніндегі шаралар пакетін, 2019-2021 жылдарға арналған БҰҰ-ның Жаһандық терроризмге қарсы стратегиясын іске асыру жөніндегі ҰҚШҰ елдерінің ұжымдық іс-қимыл жоспарын және ҰҚШҰ дағдарыстық әрекет ету орталығының ақпараттық өзара іс-қимыл регламентін мақұлдады.

Сыртқы саяси ведомстволардың басшылары 2019 жылға арналған Бірлескен өтініштер тізбесін, сондай-ақ Ұйым қызметінің барлық бағыттары бойынша сарапшылардың жыл сайынғы кеңес беру жоспарын бекітті.

Отырыс қорытындысы бойынша, сондай-ақ НАТО-ға мүше мемлекеттердің СІМ басшыларына ынтымақтастықты дамыту және өзара сенімді нығайту туралы ұсыныстармен ашық үндеу қабылданды. Құжатта бағалау мен ақпарат алмасу, қауіпті әскери қызметтің алдын алу тетігін құру, оқу-жаттығуларға өзара шақыру, екі ұйымның басшылығы мен органдары арасындағы тікелей диалогты дамыту сияқты бірқатар практикалық бастамалар бар. 

Сондай-ақ, Бішкектегі кездесуде Сыртқы істер министрлері Беларусьтің Екінші дүниежүзілік соғыс кезінде босатылуына 75 жыл толуына орай бірлескен мәлімдеме жасады.

Қырғызстан астанасындағы кездесудің практикалық нәтижелерінің бірі ҰҚШҰ СІМК-нің Ұжымдық Қауіпсіздік Кеңесіне ҰҚШҰ Бас хатшысы қызметіне Беларусь Республикасынан келісілген кандидатураны ұсыну туралы шешіміне қол қою болды.

Жалпы, отырыс қорытындысы бойынша қабылданған құжаттар Ұйымды одан әрі нығайтуға бағытталған, ал бұл кезекті рет ҰҚШҰ-ның ашықтығын және оның басқа елдермен және халықаралық құрылымдармен ынтымақтастықты кеңейтуге оң көзқарасын көрсетті.

ҰҚШҰ Сыртқы істер министрлері кеңесінің келесі отырысы Бішкекте 2019 жылғы 28 қарашаға жоспарланған ҰҚШҰ Ұжымдық Қауіпсіздік Кеңесінің сессиясы қарсаңында өтеді.

ҰҚШҰ 2002 жылғы 7 қазанда Кишинев қаласында құрылды. Белгілі болғандай, Ұйымға Қазақстаннан басқа Армения, Беларусь, Қырғызстан, Ресей және Тәжікстан кіреді.

ҰҚШҰ құрудың негізгі мақсаттары бейбітшілікті, халықаралық, өңірлік қауіпсіздік пен тұрақтылықты нығайту, ұжымдық негізде ұйымға мүше мемлекеттердің тәуелсіздігін, аумақтық тұтастығы мен егемендігін қорғау болып табылады, оларға қол жеткізуде саяси-дипломатиялық құралдарға басымдық беріледі.

ҚазАқпарат

Бүгін ҚР Үкіметінің баспасөз орталығында өткен баспасөз конференциясы барысында «Бәйтерек» ҰБХ» АҚ басқарма төрағасы Айдар Әріпханов «БЖК-2020» бағдарламасының іске асырылуы және «Даму» кәсіпкерлікті дамыту қорының қызметі туралы айтып берді.

«Бәйтерек» холдингі үшін шағын және орта бизнесті қолдау — оның жұмысының басты бағыттарының бірі. Ол үшін еншілес ұйым — «Даму» кәсіпкерлікті дамыту қоры жұмыс істейді, қор нарыққа 25 жыл бұрын шыққан.

«Бәйтерек» ҰБХ» АҚ басқарма төрағасы А. Әріпханов атап өткендей, мемлекеттік бағдарлама аясында шағын және орта бизнес субъектілері кепілдік қамтамасыз ету жетпеген жағдайда несиелер бойынша субсидиялау және кепілдендіру түрінде қолдау ала алады.

«Біз шағын/моно қалалардағы және ауылдық жерлердегі экономиканың басымдықты салаларындағы бизнесті, сондай-ақ экспорттық әлеуетті, жақын және алыс шетелдердің нарығына шығатын біздің экспортшыларды қолдаймыз. Бұл бағдарлама іске қосылған уақыттан бері 13 мың жоба субсидияланып, 5 мың жоба кеплідендірілді (2010 ж. бері)», — деді А. Әріпханов.

«Бәйтерек» ҰБХ» АҚ басқарма төрағасы холдингтің бағдарламаларды іске асыру бойынша облыстардың әкімдіктерімен белсенді ынтымақтастық орнатқанын атап өтті. Кәсіпкерлерге мұндай қолдау көрсету Қазақстан экономикасына ауқымды оң әсерін тигізеді. «БЖК-2020» бағдарламасы іске асырылған жылдары бағдарлама қатысушылары 900 млрд салық төлеген, 13,5 трлн теңгеге жуық сомаға өнім шығару қамтамасыз етілді. Оны іске асырудың арқасында 90 мыңнан астам жұмыс орындары құрылып, 312 мыңға жуық қазір бар бос орындарға қолдау білдірілді.

Сонымен қатар, «Даму» қорының желісі бойынша 18 Кәсіпкерлерге қызмет көрсету орталығы және Қазақстанның 14 облысында Кәсіпкерлікті қолдаудың мобильдік орталықтары жұмыс істейді. Кәсіпкерлер үшін «бір терезе» қағидаты бойынша барынша қолайлы жағдайлар жасалған. Орталықтың операция залдарында түрлі бағыттар бойынша кеңесшілер, сервистік компаниялар қызметкерлері, «Атамекен» ҰКП қызметкерлері, екінші деңгейлі банктер мен «Даму» қорының өкілдері жұмыс істейді.

«2013 жылы Кәсіпкерлерге қызмет көрсету орталықтары ашылғаннан бері олардың базасында 349 мыңнан астам клиентке қызмет көрсетіліп, оларға 545 мың кеңес берілді. 2018 жылдан бастап Қордың КҚКО базасында менеджерлер кәсіпкерлердің жобаларына олардың өтінімдерін екінші деңгейлі банктер мақұлдағанға дейін қолдау көрсету қызметтерін ұсынады», — деді А. Әріпханов.

2018 жылдан бастап 2019 жылдың 1 мамырындағы жағдай Кәсіпкерлерге қызмет көрсету орталығы базасында 7,7 жобаға қолдау көрсетілді.

Сонымен қатар А. Әріпханов ҚР Тұңғыш Президенті - Елбасы Н. Назарбаевтың тапсырмасы бойынша «Бизнестің жол картасы- 2020» бағдарламасы тағы бес жылға созылатынын айтты. Айналымдағы қаржыларды толықтыруға субсидиялау және кепілдендіру бойынша несиелер көлемін 60 млн теңгеден 360 млн теңгеге дейін арттыру жоспарланған. Несие мақсаттарының тізімі кеңейтіледі - енді қазақстандық және шетелдік франчайзингті пайдаланумен өзінің бизнесін бастайтын немесе жұмыс істеп тұрған бизнесінің жаңа бағыттарын дамытатын кәсіпкерлерге қолдау көрсетілетін болады. Бағдарламаға қатысушы операторлар арттырылады, оларға шағын қаржылық ұйымдар қосылады.

Бұдан өзге, холдинг «QazTech Ventures» АҚ еншілес ұйымы арқылы бизнес-инкубациялау жүйесін дамытады. Компания сыртқы сарапшыларды тартумен, жобаларды коммерцияландыру мәселелері бойынша инкубатордардың жұмысына консультациялық қолдау көрсетеді, сонымен қатар бизнес-инкубаторлар резиденттеріне жобаларды гранттық қолдауға ие болуда ықпал ететін болады. 2019 жылы кемінде 3 бизнес-инкубаторды қолдау жоспарланған.

www.primeminister.kz

Бүгін Үкіметтің баспасөз орталығында өткен баспасөз конференциясында ұлттық экономика вице-министрі Ермек Алпысов «Бизнестің жол картасы-2020» мемлекеттік бағдарламасы аясында қолдаудың жаңа шаралары туралы айтып берді.

Вице-министр 2019 жылдан бастап Елбасының тапсырмасы бойынша «қарапайым заттар экономикасын» дамыту бойынша қолжетімді несиелендіру міндеттерін шешу үшін 600 млрд теңге бөлінетінін айтты.

Экономикалық қызметтің 65 түрінен 365 тауарлық позиция айқындалды. Бұл несиелер «БЖК-2020» бағдарламасы арқылы субсидияланады.

А.ж. 1 мамырындағы жағдай бойынша банктер 14,9 млрд теңге сомасына 28 өтінімді мақұлдаған. ЕДБ қарауында 139,2 млрд теңгеге 104 жоба жатыр. 613,4 млрд теңге сомасына 729 жобаның құжаттары әзірлену сатысында. «Даму» қоры 8 млрд теңге сомасына 24 жоба бойынша субсидиялауды мақұлдады.

Сонымен қатар, бизнесті қаржыландырудың қолжетімділігін арттыру мақсатында «қарапайым заттар экономикасы» бойынша айналымдағы қаражатты несиелендіру үлесін 30%-дан 50%-ға дейін арттыру шаралары қабылданды. «БЖК-2020» арқылы «қарапайым заттар экономикасын» кепілдендіру тетігі енгізілді. Сондай-ақ «БЖК-2020» бағдарламасы бойынша қаржыландыруды арттыру ұсынылады.

«Бизнестің жол картасы-2020» бағдарламасы бойынша субсидиялау мен кепілдендіруге өтінімдер саны жылдан-жылға артып келеді. Елбасының тапсырмасы бойынша бұл бағдарламаға қосымша 30 млрд теңге қаржы бөлінетін болады.

Е. Алпысов әкімдіктердің өңірлік экономикаларды дамытуға мүдделі болуы керектігін атап айтты. Сондықтан жергілікті атқарушы органдар мемлекеттік қолдау шараларын бірге қаржыландыруы тиіс.

Мысалы, Алматы әкімдігі қосымша резервтерден субсидиялауға 1,9 млрд теңге бөлді. Шымкент әкімдігі де қосымша резервтерден кепілдендіруге 250 млн теңге бөлді. Атырау облысының әкімдігі субсидиялауға 600 млн теңге бөлді. Қалғандары осы әкімдіктерден үлгі алуы тиіс.

«Кәсіпкерлік - мемлекеттің тұрақты экономикалық өсімінің және халықтың әл-ауқатының маңызды түйіні. Жалпы, бизнестің дамуының оң динамикасы байқалып отыр. Бизнесті мемлекеттік қолдау шараларының көлемі артып келеді», — деді ұлттық экономика вице-министрі.

Е. Алпысов шағын және орта бизнесті одан әрі ынталандыру үшін бизнес-ортаны дамыту бойынша заңнамалық түзетулердің жетінші пакеті қабылдағанын жеткізді, бұл түзетулер кәсіпкерлік қызметті дамыту үшін қолайлы жағдайлар жасауға бағытталған.

«ДКБ-2020» бағдарламасын 2025 жылға дейін ұзарту аясында бағдарлама тұжырымдамасы әзірленді, Жұмыс тобы құрылды және барлық деңгейлерде талқылаулар басталды.

Қаржылай қолдау тетіктерін жетілдіруге бағытталған түзетулер әзірленді, атап айтқанда:

кепілдендіру үшін несие көлемін арттыру арқылы кепілдік бойынша жүктемені төмендету;

шағын қаржылық ұйымдарды тарту;

айналым қаражатының үлесін арттыру;

кәсіпкерлердің тиімді жобаларына талаптарды көтеру;

Мемлекеттік бағдарлама құралдарын арттыру (франшиза, ШОБ-ты қаржылай емес қолдауды күшейту, басымдықты салаларды кеңейту т.б.) және т.б.

Ұлттық экономика вице-министрі бизнес-қауымдастықтарды бұл іске белсене қатысуға шақырды.

«Біз барлық ұсыныстарды қарастыруға әзірміз. Мен бұл шаралардың бизнесті қолдау және қаржыландыру шараларының қолжетімділігін арттыратынына, сондай-ақ бизнестің ел экономикасына үлесін көбейту мүмкіндігін тудыратынына сенімдімін. Кәсіпкерлікке қолдау көрсету маңызды. Министрлік әрдайым мұндай жұмыстарды жалғастыра беретін болады», — деді Е. Алпысов.

www.primeminister.kz

Бүгін Үкіметтің баспасөз орталығында өткен баспасөз конференциясында ұлттық экономика вице-министрі Ермек Алпысов «Бизнестің жол картасы-2020» мемлекеттік бағдарламасы аясында елімізде шағын және орта бизнестің дамуы мен көрсетілетін қолдау шаралары туралы айтып берді.

«Бизнестің жол картасы-2020» мемлекеттік бағдарламасының негізгі мақсаттары – өңірлік кәсіпкерліктің тұрақты әрі теңгерілімді өсімін қамтамасыз ету, қазіргі және жаңадан құрылатын жұмыс орындарына қолдау көрсету.

Бағдарлама іске асырылған төрт жылдан бері республикалық бюджеттен 210,5 млрд теңге бөлінді. Бұл қаражат 13 мың ШОБ субъектісін қаржыландыруға, орта есеппен жылына 20 мың кәсіпкерді оқытуға, 10 мың жұмыс орнын құруға, 3,3 трлн теңге сомасына өнім шығаруға мүмкіндік берді. Төленген салықтар сомасы жыл сайын 175 млрд теңгені құрады.

«Жалпы, бағдарлама іске асырылған төрт жылда республикалық және жергілікті бюджеттерден 247,1 млрд теңге көлемінде 13 380 жобаға қолдау көрсетілді», — деп нақтылады ұлттық экономика вице-министрі.

Бөлінген қаражаттың басым бөлігі несиелер бойынша сыйақы мөлшерлемесін субсидиялауға бағытталды (126 млрд теңгесі немесе барлық соманың 60,1%). 53 млрд теңгесі немесе 25,2% фабрикаларға, зауыттарға және ШОБ өндірістік нысандарына жеткіліксіз инфрақұрылымды жүргізуге бағытталды. Қалған бөлігі несиелерді кепілдендіруге, гранттар ұсынуға, кәсіпкерлерді оқытуға және оларға кеңес беру қызметтеріне жұмсалды. Бағдарлама тетіктерін сұраныс өте жоғары.

Жалпы шаралар нәтижесінде ШОБ-тың экономикадағы маңызы артты. Мәселен, 2015 жылы ЖІӨ-дегі ШОБ үлесі 24,9% құраса, 2018 жылдың қорытындысы бойынша 28,3% болды. 2015 жылмен салыстырғанда, шағын және орта кәсіпкерлердің ел экономикасына қатысуы 3,4 пайыздық пунктке жоғарлады.

2018 жылдың қорытындысы бойынша ШОБ-тың өнімдер шығару көлемі 26 трлн теңгеден асты. Бұл ретте, өнім шығару құрылымының бестен бір бөлігі өнеркәсіптің үлесіне тиесілі.

Жалпы, 2018 жылы елімізде өндіріс өсімі 2015 жылғы деңгейден нақты мәнінде 114% (немесе 26,5 трлн теңгені) құрады.

Ал 2019 ж. 1 қаңтардағы мәліметтер бойынша, шағын және орта кәсіпкерлік субъектілерінің саны 1,2 млн бірлікті құрады. Өткен жылдың осындай кезеңімен салыстырғанда, бұл көрсеткіш 8,3%-ға артты.

Сонымен қатар ұлттық экономика вице-министрі Е. Алпысов 2019 ж. І тоқсандағы шағын және орта кәсіпкерліктің даму қорытындылары туралы ақпараттандырды. Бұл кезеңде барлығы 715 жобаға қолдау көрсетілді.

Жергілікті атқарушы органдар конкурстық рәсімдер қорытындысы бойынша осы жылдың екінші жартысында гранттар бере бастайды.

2019 жылы 15 инфрақұрылымдық жоба бойынша 7,3 млрд теңге қарастырылған. Жобалар іске асырылу сатысында.

«Бизнестің жол картасы-2020» бағдарламасының маңызды бағыты кәсіпкерлік әлеуетті нығайту болып табылады. Бұл бағыт бизнес жүргізу негіздеріне оқыту бойынша жобалар кешенін, шағын және орта бизнес құзыреттерін көтеруді, әлеуетті және өз ісін бастаған кәсіпкерлерге қолдау көрсету үшін консультациялық кеңес беруді қамтиды. Кеңес беру кезінде бизнес-жоспарды қалай әзірлеу, салықтарды қалай төлеу, декларацияны қалай тапсыру, банктерге қалай жүгініп, лицензияны қалай тапсыру т.б. керектігі түсіндіріледі.

Осылайша, жыл сайын 20 мыңға жуық кәсіпкер оқытылып, құзыреттері арттырылатын болады, орта есеппен алғанда 154 мың кәсіпкер жыл сайын консультациялық (110 мың) және сервистік (44 мың) қызметтер алатын болады.

Биылғы жылдың І тоқсанының қорытындысы бойынша 6 135 тыңдаушы бизнес-мектептерде кәсіпкерлік негіздері бойынша оқытудан өтті. Кәсіпкерлерді қолдау орталықтарында бизнесті мемлекеттік қолдау шаралары бойынша 19,5 мың клинетке 36 мыңнан астам кеңес берілді, 7 мың кәсіпкерге 8 мыңға жуық сервистік қызмет көрсетілді.

www.primeminister.kz

Шанхай ынтымақтастық ұйымына мүше-мемлекеттердің Сыртқы істер министрлері кеңесінің (ШЫҰ СІМК) отырысына қатысу қарсаңында ҚР Сыртқы істер министрі Бейбіт Атамқұлов Қытай Халық Республикасы Мемлекеттік кеңесінің мүшесі, Сыртқы істер министрі Ван Имен кездесті.

Қазақстан мен Қытай сыртқы саяси ведомстволарының басшылары саяси, сауда-экономикалық салалардағы екіжақты ынтымақтастық, сондай-ақ көпжақты құрылымдардағы өзара ықпалдасу мәселелерін талқылады.

ҚР СІМ басшысы биылғы жылдың 25-28 сәуірде сәтті өткен «Бір белдеу, бір жол» 2-ші Халықаралық ынтымақтастық форумына қатысу үшін Қазақстан Республикасының Тұңғыш Президенті - Елбасы Нұрсұлтан Назарбаевтың сапарының маңыздылығын атап өтті.

Осы форумда Елбасы Н.Назарбаев әлемдік қоғамдастыққа геосаяси ахуалдың «Үш Д» үлгісін ұсынды және қытайлық тарапты оны жүзеге асыру үшін одан әрі жан-жақты қолдауды сұрады.

Ван И биыл 14-16 мамырда ҚКП Орталық комитеті Тұрақты комитетінің мүшесі, ҚХР Мемлекеттік кеңесінің вице-премьері Хан Чжэннің Қазақстан мен Қытай 2-ші Өңіраралық ынтымақтастық форумына және 12-ші Астаналық экономикалық форумына қатысу үшін Қазақстанға сапарын ойдағыдай өткізілгені үшін алғыс білдірді.

Қытай СІМ басшысы Қазақстанда алдағы уақытта өтетін президенттік сайлаудың табысты болатынына сенім білдірді.

Қытайлық тарап «Бір белдеу, бір жол» бастамасын жүзеге асыруда Қазақстанның жетекші рөлін ерекше атап өтіп, оны «Нұрлы жол» ЖЭС-пен терең ұштастыру арқылы өзара көлік байланыстарын көтеруді, сондай-ақ оны ілгерілетуде екі елдің көшбасшылығын сақтауды ұсынды. Бұл өз кезегінде, біздің елдер арасында цифрлық экономиканы дамыту, цифрландыру, жоғары технологиялық, инновациялық және электрондық коммерция саласындағы жаңа жобалардың санын арттыру бойынша индустриялық-инвестициялық ынтымақтастықты нығайтуға ықпал етеді.

Ван И Қытай Қазақстанмен көпжақты күн тәртібіндегі кең ауқымды мәселелер бойынша да өзара тығыз ынтымақтастыққа, ҚР Тұңғыш Президенті - Елбасы Н.Назарбаев құрудың басында тұрған ШЫҰ, АӨСШК сияқты халықаралық ұйымдар шеңберінде тиімді үйлестіруге мүдделі екенін атап өтті.

Сыртқы саяси ведомстволарының басшылары екі елдің ШЫҰ-да бірқатар бастамаларына өзара қолдауды атап өтті, атап айтқанда ШЫҰ Даму банкін құру, ұлттық валютадағы өзара есеп айырысу үлесін ұлғайту, транзит-көліктік әлеуетін пайдалану және т.б.

Тараптар өзара қызығушылық тудыратын мәселелер бойынша тұрақты байланыстар мен қолдауды жалғастыруға келісті.

ҚазАқпарат

Кездесуде Қазақстанның Тұңғыш Президентіне «Әлеуметтік қамқорлық» атты жаңа әлеуметтік шараларды түсіндіру жөніндегі үкіметтік жұмыс тобының қызметі туралы мәлімделді. Бұл туралы ҚР Тұңғыш Президенті – Елбасының баспасөз қызметі хабарлайды.

Нұрсұлтан Назарбаев Бердібек Сапарбаевтың министрлік алдына қойылған міндеттерді шешу үшін мол тәжірибесі мен басқару машығы бар екенін атап өтті.

«Тәжірибеңіз көп. Маңызды жұмыстарды атқардыңыз. Үш облысты басқардыңыз. Жақсы жұмыс істедіңіз. Көп сала бойынша Ақтөбе облысының көрсеткіштерін көтердіңіз. Сіз министрлікке осы саладағы жұмыстарды жақсарту үшін тағайындалдыңыз. Тәжірибелі азамат керек болды. Халқымыздың игілігі үшін белгіленген мәселелердің бәрін шешу қажет», — деді Елбасы.

Бердібек Сапарбаев Нұрсұлтан Назарбаевқа министрлік тарапынан қазақстандықтардың тұрмыс деңгейін көтеруге бағытталған жаңа әлеуметтік шараларды жүзеге асыру үшін атқарылып жатқан жұмыстар жөнінде әңгімеледі.

Қазақстанның Тұңғыш Президенті мұқтаж адамдарға көмек көрсету үдерісіне тиісті бақылау жасаудың қажеттігін атап өтті.

«Қазір әлеуметтік салаға бөлінетін қаражат мемлекет табысының жартысына жуығын құрайды. Барлық жұмысты жүйелендіру қажет. Ең алдымен, азаматтарымыз жұмыс орындарымен қамтылуға тиіс. Әрине, белгілі бір жағдайларға байланысты жұмыс істей алмайтындар бар. Біз соларға көмектесуіміз керек», — деді Елбасы.

Сонымен қатар, Б. Сапарбаев өңірлерде тұрғын үй мәселелерін шешу және ерекше қамқорлыққа мұқтаж адамдарға қолдау көрсету үшін атқарылып жатқан жұмыстар туралы баяндады. Министр бизнестің әлеуметтік жауапкершілігі қағидатын жүзеге асыру аясында кәсіпкерлермен бірге қолға алынып жатқан шаралар туралы айтты. Бердібек Сапарбаев, сондай-ақ, көші-қон және көп балалы отбасылар мен оралмандарға қолдау көрсету мәселелеріне тоқталды.

Соңында Нұрсұлтан Назарбаев министрлік тарапынан атқарылып жатқан жұмыстардың маңыздылығына тоқталып, белгіленген міндеттерді тиімді шешу қажеттігін атап өтті.

www.primeminister.kz

ҚР Премьер-Министрі Асқар Мамин Қазақстанда «бесінші буын» байланыс желісін енгізу мәселелері туралы кеңес өткізді.

Кеңес барысында цифрлық экономика мен заттар интернетін дамыту үшін мүмкіндіктерді кеңейтуге жаңа технологияны енгізудің ықпалы талқыланды (IoT).

ҚР Үкіметінің басшысы берілетін деректердің ағымының жылдамдығы мен өткізгіштік қабілетін арттыру ТКШ, ауыл шаруашылығы, өнеркәсіп, денсаулық сақтау салаларында жобаларды іске асыруда телемедицианы дамыту, Smart City компонентерін енгізу, халықтың қауіпсіздігін қамтамасыз ету бойынша жұмыстардың тиімділігін арттыру т.б. тұрғысынан салмақты серпін беретінін баяндады.

ҚР Цифрлық даму, қорғаныс және аэроғарыш өнеркәсібі министрлігінің мәліметтерінше, Қазақстан АҚШ, Оңтүстік Корея, Швейцария, Эстония елдерімен қатар жаңа желіні енгізуді пилоттауға көшкен әлем елдерінің ондығына кіреді.

Ел аумағын 5G қамту үшін инфрақұрылым жасау бойынша жұмыстар аясында осы жылдың соңына дейін Нұр-Сұлтан, Алматы, Шымкент қалаларында пилоттық жобаны іске асыру жоспарланған. Жалпы, 5G байланыс желісімен адамдар саны 50 мыңнан асатын барлық елді мекендер қамтылады деп күтілуде.

Талқылау қорытындысы бойынша ҚР Премьер-Министрі Асқар Мамин Қазақстанда 5G енгізу бойынша Шаралар жоспарын әзірлеуді тапсырды.

Кеңеске ҚР цифрлық даму, қорғаныс және аэроғарыш өнеркәсібі министрі А. Жұмағалиев, ҚР индустрия және инфрақұрылымдық даму министрі Р. Скляр, «Қазақтелеком» АҚ басқарма төрағасы Қ. Есекеев және т.б. қатысты.

www.primeminister.kz

Биылғы 21 мамырда Үкіметтің кезекті отырысында арнайы экономикалық және индустриялық аймақтарды дамыту, 2019 жылғы жаз мезгілінде балалардың сауықтыру демалысын, бос уақытын және іспен шұғылдануын ұйымдастыру мәселелері қаралды. Үкіметтің баспасөз орталығында өткен баспасөз конференциясында БАҚ өкілдерінің сұрақтарына ҚР білім және ғылым вице-министрі Б. Асылова жауап берді.

Отырыстың күн тәртібінің бірінші сұрағы — АЭА мен ИА дамыту мәселесі бойынша ҚР индустрия және инфрақұрылымдық даму министрі Р. Скляр, ҚР энергетика вице-министрі Ә. Мағауов, «Самұрық-Қазына» ҰӘҚ» басқарушы директоры Ә. Пірметов АЭА аумақтарында индустриялық нысандардың іске асырылуы туралы хабарлады. Жүргізілген инфрақұрылым және жасалған жағдайлар 1 трлн теңгеден астам жеке инвестициялар тартуға мүмкіндік берді, оның ішінде 27% — шетелдік инвестициялар. 2019 жылдан 2021 жыл аралығында арнайы экономикалық және индустриялық аймақтар аумағында 11,5 мың жұмыс орнын құрумен 320-ға жуық жоба пайдалануға берілетін болады.

Мәселені қарау қорытындысы бойынша, ҚР Премьер-Министрі А. Мамин жүйелі негізде жаңа жобалар мен инвестицияларды тарту жұмыстарын жүргізіп, жұмыс орындарын құру қажет екенін атап өтті. Бұл үшін өңірлерге АЭА мен ИА-ға табысты халықаралық тәжірибелері бар кәсіптік басқарушы компанияларды тарту қажет.

«Арнайы экономикалық және индустриялық аймақтар өңірлер экономикасының өсу негізіне айналуы керек. Бұл үшін нақты үйлестірілген жұмыс пен сапалы жобалар қажет», — деді А. Мамин.

Балалардың жазғы демалысын ұйымдастыру мәселесін қарау барысында ҚР Білім және ғылым министрлігі қазақстандық жоғары оқу орындары жанынан жазғы академиялық мектептерді ашу, балалардың мәдени, тарихи, археологиялық ескерткіштерді зерттеуге бағытталған тақырыптық жорықтарға көптеп қатысуын қамтамасыз етуді ұсынды.

Мәдениет және спорт министрлігі елдің барлық кітапханаларында «әдеби ертеңгіліктер» өткізуді, музейлер мен музей-қорықтарда тегін тарихи-өлкетанулық және танымдық экскурсиялар, түрлі пленэрлер өткізуді, барлық ауылдық округтерде «жылжымалы кітапханаларды» ұйымдастыруды жоспарлаған.

Балалар мен жасөспірімдер арасында бұқаралық спорттың дамуы аясында дене шынықтырумен және спортпен мектеп жасындағы 1,8 млн бала, соның ішінде ауылдық жерлерден 816 мыңнан астам бала қамтылған.

Қазақстанның бас санитарлық дәрігері Ж. Бекшин биыл Денсаулық сақтау министрлігі балалар демалысының 200-ден астам қала сыртындағы нысанын бақылауға алғанын хабарлады. Жаппай тамақтан және судан улануға жол бермеу мақсатында Денсаулық сақтау министрлігі Бас прокуратурамен және ҚР ІІМ бірлесіп, барлық маусым кезінде жазғы лагерьлерді қатаң тексеретін болады.

Баяндамаларды тыңдау қорытындысы бойынша Үкімет басшысы жазғы кезеңде балалардың қауіпсіздігін қамтамасыз ету мәселесін ерекше бақылауда ұстауды тапсырды. Бұл тамақ сапасына, санитарлық жағдайлар мен медициналық жарақтандыруға да қатысты.

«Барлық лагерьлер медицина қызметкерлерімен және тиісті педагогикалық кадрлармен қамтамасыз етілуі тиіс. Қоғамдық орындардағы тамақтану сапасына, тамақтану орындары мен бос уақытты өткізу орындарында санитарлық тазалыққа ерекше көңіл бөлу қажет», — деп тапсырды Асқар Мамин.

Балаларды жазғы демалыспен қамтуды арттыру үшін Премьер-Министр санаторийлер мен туристік базалар, ұлттық саябақтар және жоғары оқу орындары жанында жазғы сауықтыру орталықтарын ашу, жұмыс істемей тұрғандарын оңалту бойынша жұмыстарды жүргізуді тапсырды.

Үкімет отырысының кулуарында ҚР мәдениет және спорт министрі А. Мұхамедиұлы «KIDS GO FREE» қағидаты бойынша балаларға тегін әуе тасымалдарын енгізу туралы хабарлады.

«Біз қазір мемлекеттік бағдарлама жобасын енгіздік, оның бекітілуін күтіп жүрміз және туристік қызмет туралы заңға өзгерістер енгіземіз. Шығындардың жабылғаны жақсы. Мәселен, ата-ана ел ішінде демалуға баратын болса, жанында 15 жасқа дейінгі екі бала болса, оларға тегін әуе билеттері беріледі. Ел ішінде тегін. Осының арқасында отандастарымыз шетелге шықпаса, ақша ел ішінде қалады. Яғни, біз шартты түрде 1 теңге субсидиялаймыз, мемлекет балаларға ақша бөледі, 6,5 теңге үнемдейміз. Мерзімі бойынша 2 ай ішінде мүмкін болады», — деді А. Мұхамедиұлы.

ҚР білім және ғылым министрі К. Шәмшидинова ЖОО-лардағы жемқорлықпен күрес туралы сұраққа жауап бере отырып, Академиялық адалдық лигасының жұмысы жалғасып жатқанын айтты.

«Біз бұл жұмысты жалғастыратын боламыз. Онда 12 ЖОО бар, 10-нан астам ЖОО - үміткер. Тестілік сипаттағы емтихандардан бас тартып, барынша жазбаша түрдегі емтихандарды арттыруды көздеп отырмыз. Бүкіл жүйені электронды форматқа көшіруді ойластырудамыз. Егер мұның бәрі электронды форматта болатын болса, онда қатаң бақылау болады. Анкеталау жүйесінің өзінен басқа, ЖОО-ларда жемқорлыққа қарсы күрес бойынша жаңа бағыт енгізіліп жатыр. Биыл сауалнама жүргіздік, балалардың 70%-дан астамы жемқорлықпен бетпе-бет келмейтінін айтты, бірақ қалған пайызы біздің бәрімізді ойландыруы тиіс, біз бұл бағытта жұмыс істейтін боламыз», — деді К. Шәмшидинова.

Үкіметтің баспасөз орталығында өткен баспасөз конференциясында білім және ғылым вице-министрі Б. Асылова оқушылардың жазғы демалысын ұйымдастыру туралы айтып берді. «Қазақпарат» АА тілшісінің көп балалы отбасылардың балаларын жазғы демалыспен қамтамасыз ету және жолдамалар құны туралы сұрағына жауап бере отырып, Б. Асылова лагерьлерде басымдықпен халықтың әлеуметтік сезімтал топтары тегін демала алатынын айтты. Ондай балаларға жетім балалар, ерекше білім алу қажеттілігі бар, аз қамтылған отбасылардан шыққан балалар, сонымен қатар оқу үлгерімі үздік балалар жатады.

Лагерьлердегі сауықтыру қызметтерінің бағасы мен тарифін жергілікті атқарушы органдар бекітеді. Жолдамалар құны лагерьде демалған күндеріне сәйкес (10 күн) 10 мың теңгеден 40 мың теңге аралығында болады.

«Время» газетінің тілшісінің еңбек лагерьлері туралы сауалына Б. Асылова ондай лагерьлерге балалар жұмыспен қамту орталықтары арқылы бағытталатынын айтып жауап берді. Еңбекақы төлеу жүйесі іске қосылады.

Вице-министр сонымен қатар жазғы уақытта оқушылардың демалысының қауіпсіздігін қамтамасыз ету және жаңа форматтағы лагерьлерді ұйымдастыру туралы сұрақтарға жауап берді.

Отырыстың күн тәртібіндегі екінші мәселені қарау қорытындысы ҚР Білім және ғылым министрлігінің тарапынан келесі жылы лагерьлердің санын арттыру бойынша ұсыныстарына қолдау білдірілді. Премьер-Министр тапсырғандай, нысандар санын мыңға дейін жеткізу керек.

Осылайша, ҚР Үкіметі, әсіресе, жазғы уақытта балаларды сапалы әрі қауіпсіз демалыспен және іспен шұғылданумен қамтамасыз ету бойынша жүйелі жұмыстар жүргізіп жатыр. Сонымен қатар, жартылай жұмыспен қамту бойынша ниет білдірушілер үшін барлық жағдайлар жасалған. Бұл шаралар өскелең ұрпаққа денсаулықтарын нығайтып қана қоймай, тұлғалық және коммуникациялық дағдыларын дамытуға мүмкіндік береді. Биылдан бастап енгізілетін жергілікті ЖОО-лар базасындағы жазғы мектептер балаларды тілдерді үйрену, АТ технологиялар және робототехника, тарих, филология, биотехнология, кәсіпкерлік және бизнесті жүргізу, құқықтану, сыни ойлау т.б. бағыттар бойынша оқытатын болады.

www.primeminister.kz

Мұрағат

Мамыр
2019
ДсСсСрБсЖмСнЖк
12345
6789101112
13141516171819
20212223242526
2728293031

Мемлекеттік орган басшыларының блог-тұғырнамасы

Өту